老少平安

夏日炎炎，係廚房煮飯熱到暈。

所以，我要用盡個蒸爐！！

不過到現在為止，我都未能一爐三餸，最多至可以一爐一飯加兩餸。

我要努力研究多D好味嘅蒸餸先得。

老少平安，你無奶油無食過。

又平又健康又易整，無得輸。

材料：

豆腐  1盒 （或街市買一磚，街市個D香好多，但1盒就方便D）

魚肉  約＄15 

雞蛋  1隻

做法：

魚肉用少許胡椒粉及麻油調味，拌勻。

用手弄碎豆腐，加入魚肉中。

加雞蛋，拌勻。

將所有材料倒入深碟內，蒸10分鐘即可。

（理論上灑上蔥花，淋上豉油熟油會更好味。但我家老爺唔食豉油，我家小姐唔食蔥，所以無落，但都好夠味）

以前試過唔落蛋用豆粉，效果好水汪汪，落咗隻蛋好好多。

芝士蕃茄黑毛豬午餐肉焗長通粉

無啦啦四月去咗2個旅行，都無乜開個火，五月又成日去街玩，玩完返屋企趕頭趕命煮飯，邊有時間影相！

我知，我會努力，努力UPDATE，一定。

梁九記存貨食得八八九九，淨返一罐黑毛豬午餐肉（一直唔捨得食），好，一於清埋佢。

材料：

黑毛豬午餐肉  1罐 （其實唔一定用午餐肉，鴨胸、豬扒、雞扒．．．．鍾意乜都得）

長通粉  半包 （我地一家四口，二大二細，剛好！）

茄汁  1罐 （150 oz）

淡忌廉  1盒 （200 ml）

糖  2﹣3茶匙

Parmesan cheese +  Mozzarella cheese 適量

做法：

煲一大煲水 （約1 L），加適量鹽及OLIVE OIL，放入長通粉，較指定時間少煮2分鐘。

同一時間，黑毛豬午餐肉切件，煎香兩邊備用。

焗爐預熱至220度。

倒出長通粉，混合少許OLIVE OIL，待用。

製作醬汁。將茄汁倒入鑊中，中火加熱至微滾。加糖，試味至合適口味。轉細火，倒入淡忌廉，拌勻。加入少許 Parmesan cheese 拌勻。

倒入長通粉，拌勻。將通粉及醬汁倒入焗盤。

於通粉面放上午餐肉，

再灑上Mozzarella cheese，

入焗爐焗10分鐘即成。

睇下，蓁蓁同悅悅食到唔停得口，呢個通粉，易做又好味，快餐之選！

蜜糖芥末豬扒

最近愛上芥末粒的口感，係CANDICE KITCHEN見到呢個食譜，想試好耐，但要阿囡們又刀又义食黑豚扒．．．．殺了我吧！

唔食黑豚扒，嚟個煎豬扒，都得啫！

蕃茄豬扒、洋䓤豬扒、薯仔豬扒就食得多，蜜糖芥末豬扒，你食過未？

西式醬汁，中式煮法，算唔算FUSION菜呢？

材料：
梅頭豬扒  3塊
黑胡椒  少許
鹽  少許
法式芥末醬  2湯匙
法式芥末子醬  2湯匙
淡忌廉  2湯匙
蜜糖  2湯匙

做法：

豬扒洗淨，吸乾水，用肉鬆鎚拍鬆豬扒。

用少許黑胡椒及鹽塗抹豬扒2邊，醃15分鐘。

燒紅鑊，煎香豬扒2邊至金黃，約每邊煎4﹣5分鐘。

取出豬扒，吸一吸油。將豬扒切成條狀。

準備醬汁。將法式芥末醬、法式芥末子醬、淡忌廉及蜜糖拌勻。試味，若不夠甜可再加少許蜜糖。

將豬扒回鑊，快手加入醬汁拌勻即可。

估唔到係咁酸酸甜甜咁開胃，小朋友食得開心，我又煮得開心。

不過下次有機會，都真係要試下黑豚扒～～

無油炸雞

好耐無UPDATE，要加倍努力！！！

呢輪個個都星星，連盧生都追，可惜，我無睇過！師奶係無時間煲劇的！

但係入面個炸雞啤酒，聽得多都想食。

但係．炸喎，無啦啦一大鑊油，見到都頭痛。

好彩，俾我搵到呢個無油版，先煎晒D油出嚟，再焗，又幾好喎。

材料：
急凍無骨雞脾扒 2塊
蒜蓉  1湯匙
薑蓉  1茶匙
海鹽  少許
紹興酒 1湯匙
生抽  1湯匙
麵包糠  少許

做法：
先將雞脾扒解凍、洗淨、抹乾。（我唔想阿囡食咁肥，所以去皮）

將雞脾扒切成一口大少，約1開8。

雞脾扒放入保鮮袋中，加蒜蓉、薑蓉、海鹽、紹興酒和生抽醃1小時。

將雞脾扒煎至兩邊金黄，約7成熟（約6分鐘）。

將雞脾扒放涼。焗爐預熱至180度。

雞蛋打勻，麵包糠放在一平碟內。將雞脾扒沾上雞液，再沾上麵包糠，放在已鋪錫紙的焗盤上。

入焗爐焗15分鐘即成。

食時可拌番茄醬或BB沙律醬，一樣美味。

Gigi姐手撕雞配菜飯

想整Gigi姐手撕雞好耐，但成日係街市見到其他新鮮食材，又會唔記得咗佢。

今次的起心肝，一定要試下。

冰鮮雞，33蚊隻（遇啱百佳做特價，29個9一隻添）；新鮮雞，160蚊隻。
真係差好好好好好遠！

配菜飯，簡簡單單又一餐。

材料：
冰鮮雞 1隻
五香粉 適量
海鹽 適量
（方程式：先磅一下隻雞，好似我今次咁，隻雞重2磅，就用2茶匙五香粉同2湯匙海鹽醃佢）

做法：
先將雞洗淨。
今次趕住買餸，結果失策唔記得叫雞檔同我切咗個雞頭同雞頸，結果要返屋企自己搞掂。落刀個下．．．都幾難頂。

用廚紙或棉布將雞徹底抹乾。
（我先用廚紙抹乾雞腔，因為較DIRTY，之後再用棉布吸乾水，快D又環保好多）

五香粉及海鹽拌均。

勻均抹在雞內外。

將廚紙塞入雞腔內，再用棉布包實已醃嘅雞，放入雪櫃醃一晚。

第2日，取出用水沖淨所有醃料（以免過鹹）。

抹乾雞內外，放在深碟中蒸20﹣25分鐘。（可用筷枝插入雞脾位，如没血水流出即可）

將雞去皮，撕成小條，灑上芝麻及淋上少許蒸雞的汁即成。

好易做，只係需要醃過夜，而且1隻雞，唔單止夠我地家做一餐LUNCH，仲可以有一大碟雞絲，第二朝整煲雞絲烏冬做早餐添。

33蚊，好抵食！

COMMENT：今次雞肉較鹹，下次可試減少少醃料份量。

開心果軟心曲奇

阿囡好鐘意食Mrs. Field d曲奇餅，但實在太貴啦，十幾蚊塊！以前我會係佢臨關門大減價時買俾阿囡食，但依家好日都唔“出城”1次，好難買到較抵嘅曲奇。

買唔到啫，可以自己整嘛！

於是上網搵D食譜睇下，比較之下，終於調較到一個都幾合心水既食譜。

最重要係．．．．．平好多呀呀呀～～～

材料：（約可做18﹣22塊中型曲奇）
牛油 100g
黑糖 3/4杯
砂糖 1/4杯
雞蛋 1隻
雲呢拉精油 3/4茶匙
麵粉 1 1/4杯
Baking Soda 1/2茶匙
Baking Powder 1/2茶匙
鹽 1/2茶匙
開心果 適量

做法：
將開心果用麵粉棒弄碎。預熱焗爐至180度。

牛油室溫放軟。加入黑糖、砂糖、雞蛋及雲呢拉精油，拌勻。
（因為剛好蒸野，貪方便將D牛油放埋入去，結果耐得滯變左液態，但咁仲好，仲易整，錯有錯着！）

用另一個盤將麵粉過篩，加入baking soda、baking powder同鹽，拌勻。

將麵粉混合物分多次加入牛油蛋糊中，拌勻。

加入開心果碎粒，拌勻即成曲奇麵團。

焗盤鋪上可入焗爐的膠墊（或用焗爐紙），弄濕雙手，用匙羹取出適量麵團，用手將它弄成小球體，放在焗鋪上。

記住記住記住：各小球之間要預留多D空間，約2﹣3 cm，因為係焗嘅過程佢會向四周溶開。我第1次整時就係低估咗呢點，結果變成1大塊！）

入焗爐180度焗約10分鐘，取出放上鐵架待涼，入落密實盒即成。

其實可以做不同味道，我上次整咗朱古力味，今次因為新年食淨好多開心果，所以先做開心果曲奇。（特別嗚謝2位盧小姐幫我去殼，雖然係過程中偷食咗唔少，嘿嘿！）

呢個食譜成功率都幾高，大家可以試一試。

蜜糖青檸香草雞翼

雞翼，又肥又好味，每隔一排又想會食嘅肥霸食品。

見到鬼嫁食譜整烤雞好似好得，等我轉一轉，試下用嚟整雞翼得唔得先。

又幾得喎！

係之後要抹焗爐辛苦D咁囉 （辛苦晒呀，盧生！）

材料：

雞翼 1磅（約10﹣12隻）

乾迷迭香 1茶匙

乾百里香 1茶匙

牛油 約20g（室油放軟，約20﹣30分鐘，視乎天氣溫度）

青檸 1個（渣汁）

蜜糖 2湯匙

鹽 1.5茶匙

做法：

雞翼洗淨解凍。

加入乾迷迭香 、乾百里香 、牛油、青檸及鹽，拌勻醃1個小時或過夜。

焗爐預熱230度。將雞翼放在烤架上。在烤架下鋪上錫紙，方便清洗（因為係焗嘅過程有好多汁滴到烤架下方。）

將雞翼放入焗爐焗10分鐘，取出反轉雞翼，再用230度焗8分鐘。最後用GRILL MODE 或250度焗2分鐘至金黃即可。

最後轉MODE或將溫度提高至250度時要小心睇火，一唔覺意就會變咗黑雞翼啦， 嘿嘿！

簡單到無朋友，又一味快靚正餸菜。

雞翼萬歲！！